GloomHaven 之旅 (2) (劇透)

我地接左個紅袍女人任務之後,就打開地圖睇下佢講既盜匪基地--Black Barrow係邊到

原來Black Barrow就係GloomHaven對出既山上面,居然咁近城市,呢班盜匪一係好勁,一係就低能既....

出發之前我地決定買定少少裝備傍身,畢竟帶咁多錢去盜匪基地都唔係一個好主意

大家洗曬身上既錢係基本裝備上面就正式出發去討伐盜匪

S1 Black Barrow 
MINDTHIEF (B)
SPELLWEAVER (T)
SCOUNDREL (V)
BRUTE (P)

呢班友仔個基地,我地出左GH既大閘,行左冇耐就見到,地圖都唔使睇,係正Corspewood邊緣

我地慢慢走近,發現佢根本冇人守住外面,我地係一塊黑色既地上面搵到個好細既入口,入面有條石梯連落去黑色一片既地底

我地一路落一路落,終於見到前面有光,終於見到班似係守衛既人係到,似乎唔太友善

睇落似係大佬果條友見到我地唔知係咪嚇到賴尿,居然轉身就走,仲一路行一路懶型咁同班手下講

「搞掂呢班唔好彩既柒頭」

我地都未黎得切叫佢怕死就拎返偷左既文件出黎就走鬼左去

點知佢班手下睇唔出佢係怕左我地自己走佬,居然仲係到話咩正呀,有人拎埋D錢送上門咁

你都傻既,老子要是有錢,就唔使落黎同你地打啦.....
班友仔太睇少我地,我地三兩下手勢就KO左門口班垃圾,仲有入面果堆想陰我地既弓箭手都搞掂埋

我地見冇曬敵人,就執埋地下D錢,一腳踢開賴尿佬鎖Q左既門

唔踢還自好,一踢差D嚇到賴尿

一堆骷髏戰士已經READY好等我地入黎,仲SET好曬地型放左班弓箭手係後面射我地

班盜匪居然識得控制不死生物,好彩我地有坦係到擋住,總算可以慢慢清曬佢地
睇黎班盜匪係呢到起基地唔係冇原因,而10蚊報酬搞左咁多野都未收得工,真係唔抵

但我地總算踏出左係GLOOM HAVEN生活既第一步

S1 完

Unlock Barrow Lair (S2)

Party Achievement: First Steps

由於阿伯同辟邪既加入,我地決定係進一步搗破BARROW LAIR之前,返城整頓一下,換左兩個新角色之後,就返返去個BARROW到

S2 Barrow Lair

MINDTHIEF (B)

SPELLWEAVER (L)

TINKERER (T)

CRAGHEART (S)

我地返完城整頓之後再出發,治返頭先落去條路,經過已經發臭既屍骸,穿過好似迷宮咁既墓室,開始聽到有人類傾計聲音

到底呢班係咩賊?係咁陰深恐怖既地方做咩? 我地冇深究太多,因為我地已經黎到有班弓箭手睇住既地方

好明顯,佢地係到守住啲野

除此之外,我地仲感覺到自己比人咀咒左

但冇計,為左10蚊,點都要攻入去,快手掃低左門口班人之後,我地打開左面前既門,發現一個更大既墓穴,而我地既目標人物就係副棺材後面

條友對眼好明顯有問題,眼神暗到流露出一股黑暗既力量,但好明顯仲睇到野

「你地到底係咩人?竟然夠膽阻住"GLOOM"?」

挑! 搵食者,犯法呀? 理得你乜水GLOOM呀

「等我比你地體會下到底你對付緊既係咩!」

條友口UP UP, UP完之後就好似條癲佬咁,一時呢就衝向我地,一時呢就好似裝左彈弓咁一野跳去開D墓穴既門,放D喪屍出黎咬人,正一精神有問題

為免佢癲起上黎放曬D喪屍,我地出盡奶力打死左佢,清曬D喪屍,搵到D文件

好彩都搵到幾份,幾驚條癲佬拎左去燒......

不過D文件上面寫既係鬼畫符,都唔知係咪條紅袍女人要搵果D,陣間佢扮野話唔係唔肯比錢都唔知點算

睇睇下D文件發現左張呢個地區既地圖, 冇乜咁特別,係SILVER RIVER中遊果頭有個MARK係到

我地最MARK起佢,就快手快腳返返GH,搵個紅袍女人交任

佢爽快咁比左40蚊我地,仲同我地講,如果我地有興趣,佢有另一份JOB比我地

有錢搵緊係做啦,10蚊買得D乜?

「最近係DAGGER FOREST有理鋼鐵部落,打劫左我運去首都既商隊,希望你幫我搞掂佢地」

頂! 咁大獲做乜唔報官?

「我有搵軍隊叫佢地搞搞佢,不過佢地乜都冇幫我做,如果你幫我搞掂,我會比更多錢你」

既然係咁,我地就去收拾班人啦

「非常好」個紅袍女人即刻拎左份地圖出黎,MARK左鋼鐵部落位置比我地

S2 完

Unlock Inox Encampment (S3), Crypt of the Damned (S4)

Rewards: 10 gold each, +1 prosperity

雖然決定左要再幫多次個女人,但係我地都好奇到底SILVER RIVER果到有D咩?點解個女人冇提到份地圖咁神秘?

講起地圖,就忽然有條友走過黎問我地,佢有份藏寶圖,比我地要唔要買

佢又知我地買得起既?算啦,藏寶圖吸引力巨大,我地都係照比錢買左

Unlock Sunken Vessel (S93)

Party Achievement: A Map to Treature 

愈整愈多地圖係手....

果張藏寶圖要出海咁遠水路,我地決定搞左SILVER RIVER先,睇下個紅袍女人係咪收埋D好野唔益我地!

GloomHaven 之旅 (1) (劇透)

玩左半年有多既Pandemic Legacy,終於係4月6日爆機,成功救左地球

一路都想玩既GloomHaven(GH)終於都入(LBC)手,可以展開另一個冒險

呢隻GH既世界觀類似LORD OF THE RINGS,科技LEVEL係中古歐洲時代,想像到既中古歐洲風既怪物都會有,好似獸人,不死魔物,妖精等等,當然唔少得壞既人類

GloomHaven係呢個世界入面既一座城市,個風格就係上面張圖咁

而故事既主人翁就係一班黎到呢個城市既僱傭兵,為左搵食想係呢個城市入面搵D野做

呢隻遊戲入面有好多種職業比你選擇,每次遊玩既玩家人數最多係4人,最少可以SOLO自己一個人控制兩個角色去玩

而初始角色一共只有6個可供選擇,其餘角色需要玩家去完成一D人生目標去解鎖

HIHI FC今次投入左6個人,剛剛好一人一隻角色

首先筆者(Brian)就選擇左可以召喚老鼠既MINDTHIEF, 就係鐘意佢可以召怪

辟邪(Stephen)就選擇左半坦半輸出既CRAGHEART,因為佢遲到冇得選,呢個角色其實都唔錯,又坦得下,打人又可以一次打幾件

Victor就選擇左單體輸出既SCOUNDREL,分分鐘可以秒殺BOSS

LBC本身想選擇做法師,但係比阿伯搶左黎用,所以SPELLWEAVER就比阿伯用左

陳俊達(Peter)就選擇左做坦,BRUTE,負責擋住D怪

最後,LBC唔想做近戰,唔想做坦,淨返既就係做補,TINKERER
呢個補師可以打人,可以補血,又可以回返D卡上手,算係多功能角色,係控制果個自私左D

選好人之後,個故事就由封面個紅袍女人僱傭我地去搶返佢比人偷左既文件開始

個女人同我地講,佢有份文件比人偷左,見我地班窮鬼就黎飯都冇得開,就OFFER我地一人10蚊去幫佢搶返份文件

雖然我地一人有30蚊係身,10蚊報酬真係少左D,但作為第一份JOB,唔接以後仲點出黎行?

所以我地就決定幫呢個紅袍女人,由我(B), LBC(T), PETER(P)同埋VICTOR(V)去出戰呢個任
(由於阿伯未到,LBC係呢埸用左法師)

TBC......